الفرق بين الحب .. والغرام .. والعشق

بقلم
عطيه الغريب

علاقتى شخصيا بأبويا كانت بالظبط زى علاقات كتير بين أب و إبنه..
يعنى الضحك و الكركرة .. الزعيق والشخط ..

صحيح كان عندى مشكلة دايما فى التعبير عن حبى له.. بس ده ما يمنعش إننا كنا بنكمل بعض وإن ضهرى إتكسر بعد وفاته .

آه كان بيحصل بينا خلافات زى أى أب وإبنه ..بس خلافات عيالى لقصر نظرى وصغر مخى أنا وقتها ..

كنت بحبه ..لكن أجى لحد كلمة ( أنا بحبك ) وتقف فى اللسان ماتطلعش ..

حتى لما فى مرة أستجمعت شجاعتى عشان أقولها له .. وقفت قدامه تنحت وقلت له(تصبح على خير) بدالها

من وقتها كل ماكنت أحس إنى عايز أقول له ( أنا بحبك) تطلع منى غصب عنى (تصبح على خير ) ..

كنت بقول لنفسى أصل إيه ( أنا بحبك ) دى .. هو فيه راجل يقول لراجل أنا بحبك ..

لما جت فترة تعبه على غفلة ودخل فى غيبوبة والعناية المركزة والتدهور الصحى إنتهاءا بالوفاة كل ده فى ساعات قليله ..

يمكن أكتر حاجة ندمت عليها إنه ماسمعش منى كلمة ( أنا بحبك ) بدون مكابرة ..

دعبس جواك هتلاقى واحد بس مش أكتر من واحد معاه مفاتيحك ولو غاب أو بعدتم هتنطفوا وكل واحد فيكم هيخطف حتة من التانى حرفيا ..

الناس زى الكوالين ومفاتيح الكوالين دى مع ناس تانية .. والحياة عبارة عن رحلة بحث دايمة عن اللى معاهم مفاتيحنا والعكس ..

ماتضيعوش وقت وبمجرد ما تلاقوا مفاتيحكم مع حد إشبعوا من بعض على قد ما تقدروا ..

وبالنسبة لمشكلتى مع أبويا الله يرحمه أنا خلاص عرفت أحلها إن شاء الله لما أشوفه ونتقابل بعد الحياة أنا متأكد إنى مش هضيع وقت وأول حاجة هقولها له هى ( أنا بحبك ) ..

ولحد ما ده يحصل يا أبويا ( تصبح على خير يا حاج  )